Siglingastofnun Íslands  hefur um árabil boðið landsmönnum aðgang að upplýsinga­kerfi um veður og sjólag en þær upplýsingar nýtast einkum sjómönnum og öðrum sem fást við sjávarútveg og siglingar í grennd við Ísland. Þarna fást m.a. nýjustu athuganir frá sjálfvirkum veðurathugunarstöðvum við ströndina, frá hafnarstöðvum og frá ölduduflum í grennd við landið. Einnig eru aðgengileg tölvureiknuð veðurspákort fjóra daga fram í tímann og ölduspákort sex daga. Þessi kort eru uppfærð einu sinni á sólarhring. Jafnframt eru fáanleg spákort um sjávarföll og strauma við landið, bæði með og án áhlaðanda, sem loftþrýstingur og vindur valda, spár um sjávarhæð í mörgum höfnum og á öðrum stöðum við ströndina.

Kerfið hefur verið lítið breytt um langa hríð enda reynst vel. Nú er stefnt að því að auka það talsvert og endurbæta. Breytingarnar felast einkum í því að nýttar verða tölvuspár um veður og sjólag fyrir stærra svæði en áður þannig að nú má birta spákort fyrir allt hafsvæðið milli Grænlands og Noregs, allt austur í Barentshaf. Þessar spár munu nýtast öllum skipum sem sigla um norðanvert Atlantshafið. Þá verða nýttar spár á þéttara reiknineti en áður. Það mun væntanlega verða til góðs fyrir útreikninga á sjávarföllum auk þess sem hægt verður að birta nákvæmari veðurspákort fyrir miðin næst landinu. Þá hefur spátímabilið verið lengt þannig að veðurspár munu ná fimm daga fram í tímann og ölduspár sjö daga. Síðast en ekki síst má nefna að öll kort og sjávarfallaspár verða nú reiknuð tvisvar á sólarhring, eldsnemma morguns og um hádegisbil. Með því móti verða upplýsingarnar mun áreiðanlegri en áður og minni líkur á að kortin lendi úr takti við raunverulega þróun veðursins.

Sem fyrr er mestan fróðleik að finna á spákortum af ýmsu tagi en einnig má fá spár sem tímaraðir á töfluformi, til dæmis öldu- og veðurspá, sjávarföll og strauma. Eftir sem áður eru öll spágögn fengin frá evrópsku veðurreiknimiðstöðinni, ECMWF, en það er almennt viðurkennt að gögn þaðan séu þau bestu sinnar tegundar sem völ er á í heiminum. Ölduspár eru m.a. bornar reglulega saman við mælingar frá íslenskum ölduduflum og er samsvörun mjög góð. Gögnin berast Siglingastofnun fyrir milligöngu Veðurstofu Íslands.

Samkvæmt reglum Alþjóðaveðurfræðistofnunarinnar um veður- og ölduathuganir skal skilgreina vindátt/ölduátt (wind direction, wave direction) sem þá átt sem vindur/alda kemur úr. Í haffræðilegum texta tíðkast hins vegar að tala um öldustefnu og straumstefnu sem þá átt sem öldur/straumur hreyfast í. Hér er valin sú leið að nota orðið ölduátt (til samræmis við vindátt) þegar um er að ræða hina veðurfræðilegu merkingu.